Os usuarios do sistema

Os equipos arrancan de xeito automático cun usuario con permisos limitados denominado "usuario" con contrasinal "usuario".

Este usuario "usuario" pode traballar perfectamente coas aplicacións instaladas pero non pode instalar novo software no equipo ou actualizar ou desinstalar o existente.

Para realizar modificacións esenciais no sistema, existe un superusuario "root" do que falaremos a continuación.

Actualización da maqueta. Permisos.

A diferencia do que acontece co equipamento do proxecto Abalar, no cal o mantemento e as actualizacións da maqueta realízanse de xeito centralizado e transparente para o usuario a través da wifi e do servidor Abalar existentes nestes centros, no caso do proxecto Aulas Dixitais a responsabilidade destas actuacións recae no usuario do sistema con permiso de administración.

Este superusuario denomínase "root", con contrasinal "toor".
Así pois, calquera actuación que supoña modificacións do sistema como instalación de novo software ou actualización ou eliminación do existente, requirirá ter permisos de superusuario e deberase realizar identificándose no equipo como "root".

En moitas ocasións, para realizar tarefas como superusuario en GNU/Linux será preciso abrir un terminal e traballar en modo texto escribindo directamente os comandos a executar. Noutros casos existirán ferramentas gráficas que simplificarán o traballo pero que realmente na práctica executan os mesmos comandos en modo texto de forma transparente para o usuario.

Identificarse como usuario root do sistema

Retroalimentación

Menú de aplicativos-->Emulador de terminal

Abrirase unha consola de terminal que devolve a información do sistema e permite introducir comandos. É moi relevante observar a última liña, na que se sitúa o cursor para poder introducir comandos:

usuario@usuario:~$

O texto á esquerda da arroba indica o usuario que iniciou sesión no equipo. (No noso caso, como xa indicamos anteriormente, o equipo arranca automaticamente co usuario "usuario").
O texto á dereita da arroba "@" e ata ":" indica o nome da máquina (hostname). Os nomes dos equipos de Aulas Dixitais tamén son "usuario".
O símbolo "~" denominado vírgula indica a carpeta persoal do usuario activo (usuario "usuario"). Esta é a única carpeta onde o usuario "usuario" pode crear, actualizar ou eliminar a súa información de carácter persoal, como veremos nun apartado anterior. Na práctica correspóndese coa ruta "/home/usuario"
O carácter $ indica que o usuario activo (usuario co nome "usuario") é un usuario normal, sen permisos de administración.

Para iniciar unha sesión como usuario administrador, escribiremos o comando "su":
usuario@usuario:~$ su

O sistema pedirá o contrasinal (password) de administrador: "toor"
Por razóns de seguridade, o sistema non amosa a introdución dos caracteres do contrasinal.

A liña de comandos (tamén denominada "prompt") convírtese en:

root@usuario:/home/usuario#

Nota: Fixarse que á esquerda da arroba (@) amósase o nome do usuario activo no terminal, que agora é "root". A destacar que:

A liña de comandos para o usuario "usuario" con permisos estandar remataba en "$".
A liña de comandos para o usuario "root" con permisos de administración remata en "#".
Á dereita da arroba amósase o directorio do sistema, neste caso "/home/usuario" que é exactamente o mesmo que o representado polo carácter da vírgula (~)

OLLO: A partir deste momento calquera comando que executemos pode modificar de xeito significativo o sistema!

Para pechar a consola de root e volver a ser o usuario sen permisos de administración (usuario "usuario") escribiremos o comando "exit"

root@usuario:/home/usuario#exit

Cambio de contrasinal de root

Licenciado baixo a Licenza Creative Commons Recoñecemento Non-comercial Compartir igual 3.0

« Anterior | Seguinte »